LAXEY og Baader á Íslandi hafa gert með sér samning um afhendingu á vinnslubúnaði fyrir væntanlegt sláturhús LAXEY fyrir landeldislax. Baader, sem er alþjóðlegt fyrirtæki í þróun og framleiðslu á tækjabúnaði fyrir laxavinnslu, er þekkt fyrir lausnir sem hannaðar eru með gæði framleiðslu og dýravelferð í huga. Þessi nálgun gerir Baader að góðum samstarfsaðila fyrir LAXEY, sem leggur áherslu á ábyrgðarfulla matvælaframleiðslu og uppfyllir um leið kröfur viðskiptavina um allan heim.
Samningurinn markar tímamót fyrir bæði félög, sem sjá fram á að styrkja stöðu sína á ört vaxandi markaði landeldis á Íslandi. Fyrir LAXEY er samstarfið mikilvægt í að tryggja búnað og framleiðslutækni, sem mun styðja við áætlanir þess um hágæða afurðir fyrir alþjóðlegan markað.
„Við erum spennt fyrir þessu samstarfi við Baader, sem er í fararbroddi þegar kemur að tæknilausnum fyrir sjávarútveg. Þessi samningur getur lagt grunninn að árangursríku samstarfi og við væntum þess að þetta verði upphafið að farsælu sambandi sem mun stuðla að því að efla íslenskan landeldisiðnað“ segir Kristmann Kristmannsson, verkefnisstjóri vinnslu og innkaupa.
Karl Ásgeirsson, sölustjóri Baader á Íslandi, bætir við: „Við erum stolt af því að taka þátt í þessu mikilvæga verkefni með LAXEY. Okkar búnaður mun tryggja að þeir geti staðið undir þeim ströngu kröfum sem gerðar eru til gæða í framleiðslu á alþjóðlegum markaði.“
Á myndinni sjást Kristmann Kristmannsson, verkefnisstjóri vinnslu og innkaupa hjá LAXEY, og Daði Pálsson, framkvæmdarstjóri LAXEY, innsigla samninginn með Karli Ásgeirssyni, sölustjóra Baader á Íslandi.
